Robert Marchand, 102-jara, superis, la 31-an Januaro 2014, sian propran rekordon pri la distanco irita dum unu horo bicikle, fare de centjarulo. Li biciklis preskaŭ 27 kilometrojn dum unu horo. Li restas la ĉampiono de la kategorio de la cent-kaj-pli-jaruloj, speciale kreita de la Internacia Biciklista Unio. En 2012, li starigis 24.251 kilometra rekordon. Tiu granda faro okazis en la tutnova olimpia ciklostadiono de Saint-Quentin-en-Yvelines, Francio.

Senminigado en Sangatte : la kvin Rommel-aj fostoj detruitaj, la ĉirkaŭaĵo denove alirebla
La senminigado en Sangatte*, planita post la malkovro de kvin Rommel-aj fostoj kaj unu obuso meznovembre sur la plaĝo de Sangatte, okazis mardon en favoraj kondiĉoj. Tagmeze, la kvin militiloj estis veturigitaj traktore al la detruejo, situanta 2 kilometrojn for de la descendejo*, kie ili estis detruitaj de mararmeaj plonĝistoj je la dua kaj 2 minutoj posttagmeze. Je la tria kaj duono, pli frue ol konjektite, oni denove permesis la preterpason.
Matene, ĉirkaŭ la naŭa kaj duono, la 135 homoj loĝantaj proksime estis senincidente evakuitaj. La ceteraj, aŭ ili jam foriris, aŭ ili enfermiĝis hejme. La aŭtoritatoj tamen devis kontraŭstari dum 10 minutoj la malvolemon de 70-jarulo, kiu rifuzis forlasi sian domon, situantan proksime de la plaĝo kaj precipe de la bomboj datiĝantaj de la Dua Mondmilito. Finfine la urbestro kaj la kapitano, membro de la grupo de la mararmeaj senminigistoj kaj plonĝistoj, konvinkis lin. La sangatt-ano* kaj lia edzino forlasis sian domon.
Pro la eventuala danĝereco de la misio, la pretertrafikon oni malpermesis de la oka matene ĝis la kvina vespere. La urbo estis silentega. La loĝantoj zorge fermis la ŝutrojn kaj malfermis la fenestrojn, kiel rekomendite. 12 ĝendarmoj, 31 policanoj kaj 6 natur-gardistoj de Eden62 postenis ĉirkaŭ la danĝera zono.
La helikoptero de la Civila Protektado flugas super la zono ; la ĝendarmoj dume postenas en la urboj Escalles kaj Peuplingues. La kalezaj policanoj respektigas la malpermeson tracirkuli la urbon.
La eden62-gardistoj ankaŭ baras la marŝpadojn. La ĉambrego Boulart, rekviziciita por la akceptado de la evakuitaj loĝantoj, finfine fermiĝis pro tro malmultaj ĉeestantoj.
Tuj post la deka, unuan 600-kilograman blokon oni traktore veturigis al la bomb-detruejo, kuŝanta du kilometrojn for de la descendejo de Sangatte, kie loĝanto malkovris la eksplodaĵojn komence de novembro. La kvar ceteraj blokoj estis translokigitaj de la senminigista kvinopo ĝis la sekura zono, tio estas izola plaĝo. La senminigistoj poste rajtis disŝiri la Rommel-ajn fostoj per eksplodaĵoj, por eltiri ties municioj. Estas la plej delikata parto por la senminigistoj, klarigis la kapitano. Post identigo de la municioj, ili estas 270 milimetraj obusoj (kiuj pezas inter 70 kaj 80 kilogramojn), oni enterigis ilin kaj eksplode detruis ilin. La pecoj kaj aliaj ruboj kolektitaj, oni purigis la zonon, registritan kiel natura2000-protektita zono.
Tuj post la malfermo de la zono, ĉirkaŭ la tria kaj duono posttagmeze, la 135 evakuitaj loĝantoj rehejmeniĝis. La policanoj plu prigardis la zonon ĝis la kvina.

*Sangatte : marborda urbeto, tuj proksima de Kalezo (Calais), en la norda parto de Francio.
*descendejo :  (franclingve :  descenderie) : surplaĝa betona deklivo, enirejo de malnova submara galerio, la unua provo de submara tunelo al Britio (1878).
*sangatt-ano = loĝanto de la urbo Sangatte
Fonto : La Voix du Nord – 10 Dec. 2013

En Kokelo : dekses migrantoj malkovritaj en cisternokamiono.
Oni malkovris dekses migrantojn merkredon matene en cisternokamiono, proksime de benzinstacio en Kokelo*. La kamionstiristo, el Rumanio, tranoktis en Kokelo, apud la areo Eŭrokaba*. Li estis veturiganta plastaĵajn globetojn el la nederlanda firmao Broekema, kaj estis trafinta Brition ĉimerkrede. Li klarigas, ke matene kun kolego li inspektis la kamionon por kontroli, ĉu ne enŝoviĝis migranto dum la nokto. » Ni nepre kontrolas », li asertis. Kontrolante ĉimerkrede matene, li konstatis, ke ŝnurego estas tranĉita ĉe la postaĵo de la ŝarĝaŭto. La stiristo tuj informis deĵoranton de la kokela benzinstacio. « Li sciigis min, pri enesto de migrantoj en sia kamiono, tial mi tuj telefonis la policon », tiu-ĉi klarigis.
La dekses migrantoj, ĉiuj plenaĝaj viroj, fartis bone. Tial la kalezaj fajrobrigadanoj, rapide senditaj surloken, tuj reiris. Male la policanoj restis surloke longatempe, atendantaj siajn kolegojn de la Landlima Polico por transdoni al ili la aferon. Finfine la landlima polico ne intervenis kaj ĉiuj migrantoj estis liberigitaj, tion sciigis la prefekturba magistrato merkredon posttagmeze.
Laŭ la benzinstacia deĵoranto, tia malkovro nun okazas ĉiun duan semajnon, « jen en Eŭrokabo, jen en la industria areo de la Dunoj. Antaŭ kelkaj tempoj, oni malkovris rifuĝintoj en ĉokoladkuvego », li diris. Tio estas problemo por la stiristoj, ĉar se oni malkovras, ke ili veturigas migrantojn, ili nepre devos redoni sian stir-licencon kaj ankaŭ pagi altan monpunon.

*Kokelo = Coquelles, franca urbo, apud Calais.
*Eŭrokaba areo : Zone Eurocap
Fonto : La Voix Du Nord – 4 Dec. 2013

Foti por rememori… ne efikus.

Foti por pliposte rememori ion fakte trafus la neatenditan malan rezulton, sciigas usona studo. Laŭ ties rezultatoj, publikigitaj en la revuo « psychological science » (psikologia scienco), homoj fotintaj objektojn dum muzea vizito pli malfacile rememoris la detalojn kompare al tiuj tutsimple rigardadintaj. « Homoj tiel fulme elpoŝigas sian fotilon, kvazaŭ senpripense, por fiksi eventon, ke ili eĉ mem forgesas tion, kio okazas antaŭ ili », rimarkigas Linda H, de la Faifield-a Universitato, iniciatinto de tiu studo.
En muzeo, Henkel petis al studentoj observi difinitajn objekjojn dum la vizito, ĉu fotante ilin, ĉu simple observante ilin. La morgaŭon, oni taksis iliajn memorojn – kaj la fotintoj pli malfacile rekonis la detalojn de la objektoj, ol tiuj kiuj nur rigardadis ilin. « Kiam homoj kalkulas je teknologio por senpena rememorigo, tio povas fakte malhelpi la bonan rememoron de iliaj spertitaĵoj », ŝi substrekas en komunikaĵo.
En dua eksperimento, studentoj zomfotinte detalon de objekto ŝajnis plibone rememori la objekton en ĝia tuto, ol la detalon mem. « Tiuj rezultatoj montras kiel malsimilaj estas la « mensa okulo » kaj la « fotila okulo », rimarkigas Linda H, rememorigante ke laboroj rilataj al la memoro sugestis, ke fotado povas ja helpi rememori ion, kondiĉe ke la fotanto poste atente observos kaj studos la foton mem. « Senorda amasigo de ciferecaj fotografoj detenas multajn homojn rerigardi ilin kaj revivigi la rilatajn memorojn », ŝi plu sugestas. ‘Por rememori, oni nepre povu konsulti la fotojn kaj interrilati kun ili, ne nur amasigi ilin ».

Traduko laŭ artikolo titolita « No Pictures, Please : Taking Photos May Impede Memory of Museum Tour », aperinta la 9-an de decembro 2013, en la retejo psychologicalscience.org