Archives pour la catégorie Sano

Grefto de reno el novnaskito al plenkreskulo

En Britio realiĝis grefto de reno el novnaskito al adolta malsanulo. La Brita SanServo ĵus konigis la eventon, okazintan jam antaŭ pluraj monatoj.
Jam de ĝia tria monato oni taksis la feton ne vivipova, ĉar ĝi ne ricevis cerbon. Ĝi havis ĝemelon kontentige kreskantan. La kuracistoj proponis al la gepatroj la aborton de la malfeliĉulo. La gepatroj tamen decidis naski la bebon, por ke ĝi fariĝu organ-donanto. Sekve, adolta malsanulo tuj ricevis la renon de la etulo.
Ĝis nun, la organojn de sencerbaj mortnaskitoj oni transdonis nur al infanoj, pro la mallarĝaj vaskuloj. Ĉifoje du malgrandaj renoj estis transplantitaj al adolta malsanulo. Dializoj foje necesas, dum la renoj ankoraŭ ne estas sufiĉe kreskintaj. Origine 6-centimetraj, ili fariĝos pligrandaj, ĝis 12-centimetraj.
Tamen maltrankviligas la ideo pri kuracila bebo : gepatroj nasku bebon, por ke ĝi siavice permesu la pluvivon de alia persono. La patro eĉ deklaras, ke lia infano mortis sed vivis heroe, kaj fierigas siajn gepatrojn. Siaflanke, la kuracisto opinias, ke temas pri malavara ago, provanta plej eble kompensi la misojn de la naturo.

Clip audio : Le lecteur Adobe Flash (version 9 ou plus) est nécessaire pour la lecture de ce clip audio. Téléchargez la dernière version ici. Vous devez aussi avoir JavaScript activé dans votre navigateur.

Redaktis Didje, laŭ sonraporto el RTL la 24-an de aprilo 2015.

Mara vermo, surogato de homa sango

Mara vermo, surogato de homa sango.

Por kompensi la nesufiĉan provizon de homa sango, firmao en Bretonio planas produkti hemoglobinon per maraj vermoj.

Ĝenerale troviĝas mara vermo sub la etaj turntordiĝantaj sablaj spagetoj videblaj sur plaĝo. Tiu vermo enhavas larĝan kvanton da hemoglobino, sentipa, do taŭga por ĉiuj homaj sangotipoj.

La firmao, Hemarina, fondita de iama esploristo de CNRS*, starigis procedon por rikolti tiun hemoglobinon, ankaŭ ruĝan. Por kolekti konvenan kvanton, ĝi intencas bredi 30 tunojn da vermoj, en larĝega akvujo, sur sabla tavolo, en mara farmo proksime de Noimoutier.

Unuatempe, la molekulo probable helpos konservi greftaĵojn el organdonacoj. Necesas agi rapidege : greftaĵoj sufokiĝas post nur kelkaj horoj. Ilin konservi en elverma hemoglobino ebligus oksigeni ilin pli longe.

Hemarina deziras komenci la unuajn klinikajn provojn antaŭ la jarfino. Ĝi kunlaboras ankaŭ kun la usona armeo por fari transfuzojn okaze de urĝega kirurgio. Provoj jam estas faritaj ĉe ratoj kaj porkoj, kies tutan sangon oni sukcesis anstataŭi per tiu de la vermoj. Tute taŭgas.

La firmao jam registris 28 patentojn. Ĝi nur atendas permeson de la Ministerio pri Industrio por ekbredi la vermojn. La ministerio iomete kontraŭstaras, ĉar maltrankviligas ĝin la 30 tunoj da vermoj samloke : kio vere okazos?

La sukceso de la projekto plej gravas : tra la mondo, ĉiujare mankas cent milionoj da litroj da sango por transfuzoj.

*CNRS : nacia scienca esplorada centrejo, en francio.

Fonto : RTL – 7 APRILO

Endormiĝo dum stirado

Unu el dek stirantoj endormiĝas veturante al sia laborejo.

Laŭ franca enketo, unu el dek stirantoj endormiĝis almenaŭ unu fojon en la jaro dum sia veturado de hejmo al la laborejo. Plejofte ili bonŝance vekiĝis antaŭ la malevetibla akcidento.
Dum la semajno, la plejmulto de la laborantoj dormas inter sep kaj ok horojn averaĝe, sed unu el tri suferas mankon de dormo pro malpli ol ses-hora dormado. La libertempa dormado iom kompensas.

Proksimume kvar pasaĝeroj el dek en la publikaj veturiloj dormetas dum iro aŭ reveno. Sed nur dek elcentoj de la laborantoj uzas publikaj veturiloj, escepte en la Pariza regiono kie ili sumiĝas je kvindek elcentoj.

Sepdek sep elcentoj de la laborantoj stiras veturilon (ĉu aŭton, ĉu ŝarĝaŭton, ĉu motorciklon) por ir-reveni laborejen.

Fonto : AFP – 26 Marto 2014

Vestoj malakrigantaj la jukojn

Vestoj por mildigi haŭtajn malsanojn.

Franca entreprenestrino baldaŭ lanĉos « sanecajn vestaĵojn », kiuj malakrigas la simptomojn de haŭtaj malsanoj, kiel psoriazo kaj ekzemo.

Estas konate, ke arĝento havas kontraŭbakterian kaj kontraŭinflaman efikojn. Tial oni uzas ĝin por cikatrigantaj pansaĵoj.

Subvestoj kaj piĵamoj el arĝentaj fadenoj probable malakrigus la simptomojn de haŭtaj malsanoj, kaj tiel oni pliprofite dormus. Post plua esplorado super arĝentaj teksaĵoj, la ideo ŝajne validas : unue, post lavadoj, la arĝenteco de la fadenoj bonege konserviĝas ; due, testinte la vestojn kun arĝentaj fadenoj, haŭtmalsanuloj rimarkis plimildiĝon de siaj jukoj.

La nacia saneca institucio (ANSM) postulis klinikan provon. Sekve, eskperimentado ĉe trideko da personoj pruvis, ke arĝento de la vesto enigas nek sangon, nek urinon.

La entreprenestrino dezirus surmerkatigi la vestojn ĉe apotekoj kaj similaj. Se oni konsiderus ilin kuraciloj, ties aĉetantoj eble ricevus partan repagon de la san-institucio…ĉar la vestoj, memkompreneble, multekostas : kalkulu proksimume 120 eŭrojn por adolta piĵamo, 100 eŭrojn por infana piĵamo. La arĝenteca vestaĵo ne estas mirakla kuracilo : ĝi uzeblas kiel komplemento al la kutimaj kuracadoj. Tamen ĝi pli efikas ol pomada ŝmirado trifojojn tage.

Laŭ artikolo el « La Voix du Nord » – 11 JAN. 2014

Energidonaj trinkaĵoj

Asocio CLV (Consommation, Logement et cadre de Vie, t.e. Konsumado, Loĝado, Vivmedio) ekkonsciigis gimnazianojn rilate al energidonaj trinkaĵoj.
En la unua horo oni klarigis al ili, kiel oni plejefike reklamadas tiujn trinkaĵojn, uzante allogajn bildojn.
Proksimume 70 elcentoj de la adoleskantoj trinkas energidonajn trinkaĵojn. Sed kion tiuj trinkaĵoj entenas? Krom granda kvanto da sukero en ili (ĉirkaŭe 14 sukerpecoj), tiuj gastrinkaĵoj ankaŭ enkalkulas nenegliktendan kvanton da diversaj substancoj, kiel kafeinon, ginsengon, taŭrinon, glukoronolaktonon… Unu komunaĵo : ilia kafeina kvanto. Normalgranda ladboteleto (250 ml) egalas 2 ekspresajn kafojn (50 ml), aŭ 2 ladboteletojn da sodakvo aŭ kolao.
Tiuj trinkaĵoj alportas kafeinan superdozon. Oni konigis nedeziratajn efektojn, kiel panik-krizon, akceliĝon de la kortaktado, nervozan staton, dorm-aŭ nerv- perturbadon (epilepsio). Por 35-kilograma lernanto, ties tolerecan nivelon jam atingas duona ladboteleto!
Fonto : Voix du Nord – 6 Feb. 2014

Dr House sukuras germanon

Serio « Dr House » helpis solvi medicinan enigmon.

La kazo de germano, sen antaŭaj gravaj sanproblemoj konataj, restis mistero, ĝis kiam la serio « D-ro House » ekvidigis traireblan vojon.
Foje fikcio kaj realo kunfandiĝas. Kun gravega kaj egale neklarigebla kor-malforteco, febro sen konata deveno, zorgiga ekperdo de la vid-kaj-aŭd kapabloj, ezofaga inflamo, la kazo de germano, 55-jara paciento sen antaŭaj zorgigaj sanproblemoj daŭre mistifikis.

Ĝis kiam profesoro de la Universitata Kliniko de Marburg ekvidis similecon kun kazo pritraktita en epizodo de la serio « Dr House », ligita al malprobabla kobalta veneniĝo.

« Serĉante kialon, kiu kunligus la diversajn simptomojn, kaj rememorante epizodon de la televida serio « Dr House », uzitan kiel lernilon por medicin-studentoj, ni eksuspektis toksiĝon per kobalto ».

Lia kurac-dosiero malplenis, ekster la anstataŭigo de la 2 koksoj per protezoj. En novembro 2010, lia maldekstra protezo rompiĝis kaj estis ŝanĝita kontraŭ metala protezo. Post 6 monatoj, la viro, ĝis tiam bonfarta, eksuferis kun neklarigeblaj simptomoj, range de ezofagaj refluoj ĝis korproblemoj.

Post la elpensa kunligo kun la televida kazo, radiografiaĵo ekmontris metalajn rubaĵojn en la kokso, dum sang-kaj-urin-elprenoj rivelis toksadon kobaltan kaj kromian, tiuj metaloj uzataj por protezoj.
Kobalta toksiĝo estas, de pli ol 50 jaroj, bone konata kialo al kor-miopatio, sed precipe koncernas la laboristojn de ŝtalfabrikoj, ĉirkaŭitajn de la metalo aŭ venenitajn pro nutraĵoj aŭ trinkaĵoj akcidente enhavantaj kobaltajn spurojn.

La anstataŭigo de la difektita protezo ebligis la malplialtiĝon de la kobalta kaj kromia sang-elcentoj kaj forte reduktis la korproblemojn de la paciento. « Mi estis bonsanĉa malkovri tion dank’al D-ro House. Tio ĉi elmontras, ke bone elpensita distraĵo kapablas ne nur distri kaj instrui, sed ankaŭ savi vivojn », diris la profesoro.

Fonto : RTL – 7 Feb. 2014

Kontaktolensoj por diabet-suferantoj

Guglo surmerkatigos kontaktolensojn por diabet-suferantoj
Guglo* anoncis, ke ĝi estas preparanta kontakto-lensojn kapablajn helpi diabet-suferantojn por kontroli sian sukerprocenton.
Oni ne povas kontraŭstari progreson. La skipo de la Gugla-laboratorio, fama pro siaj laboroj pri neordinaraj projektoj, nun interesiĝas pri kontaktolensoj. Tiuj, kiujn ili intencas produkti, kapablus helpi diabet-suferantojn kontroli sian sukerprocenton.
« Ni estas testantaj inteligentajn lensojn, celantajn mezuri la glukozprocenton en la larmoj », klarigis la du iniciatintoj de la projekto, Brian Otis kaj Babak Parviz, en bloga publikaĵo.
Mikrosensilo en la lenso
« Tiuj lensoj enhavas elektronikan blaton kaj miniaturigitan glukozsensilon, kunpremitajn inter du tavoloj el materialoj uzataj por fabriki kontaktolensojn », ili aldiris. Iliadire, oni jam klinike testadis tiun evoluiĝontan projekton, kaj oni nun pridiskutas ĝin kun la FDA, la usona medikament-agentejo. Tiuj lens-prototipoj kapablas ĉiusekunde mezuri la glukozprocenton en la larmoj.
La sciencistoj pripensas la eblecon produkti en ili lumsignalojn, kiuj sciigus al la uzantoj la preterpason de difinitaj glukozprocentoj. « Ni ĉiam proklamis, ke ni emas pritrakti plej strang-aspektajn projektojn », ankoraŭ aldonis B.O. kaj B.P. « Dum la Internacia Federacio pri Diabeto estis deklaranta, ke la mondo perdas la batalon kontraŭ diabeton, ni opiniis tiun projekton disvolvinda », ili konkludis.

*Guglo : Google
Fonto : RTL – AFP – 17 Jan. 2014

La Blogo de Didje

ĵurnalaj artikoloj tradukitaj al Esperanto